logo


Десет совети да го направите вашиот сајт поинтересен

Доколку сакате  да објавите некоја статија, информација или да споделите некоја интересна мисла, тоа значи и дека сакате вашите пораки кон публиката да бидат прочитани, но како тоа да го постигнете? Никој не сака да чита нешто што е досадно, не е оригинално или пак не е важно, особено кога има многу конкурентски материјали на веб просторот. Без оглед на темата на вашата порака кон публиката, секогаш имајте во предвид дека тоа што ќе го објавите треба да биде интересно, релевантно и оригинално. Еве десет совети.

1. Бидете свои

Ако тоа што ќе го објавите вам ви е интересно, тогаш има добри шанси да биде интересно и за другите. Само напишете нешто интересно и вистинито, без оглед на темата.

2. Бидете јасни

Многу веб-сајтови се читаат во просек од 45 секунди или помалку. Луѓето често се изморуваат од долги и конфузни статии. Заради тоа бидете кратки и јасни.

3. Користете добар наслов и поднаслов

Неопходно е да користите наслови и поднаслови кои на читателите им упатуваат јасна порака за содржината на статијата и истовремено привлекуваат внимание. Исто така на интернет пребарувачите највисоко се рангирани кратките и јасни наслови и поднаслови.

4. Користете клучни зборови

Од големо значење е да изберете соодветни клучни зборови, од кои исто така зависи рангирањето на вашиот сајт на интернет пребарувачите. Можете да го користите Google Keyword Planner за да најдете најсоодветни клучни зборови кои се најчесто користени при онлајн пребарувањето.

5. Обележете ја секоја страница

Доколку статијата има повеќе страници, најдобро е на крајот на текстот да користите знаци или бројки со кои ќе ги поттикнете и насочите вашите читатели на следниот дел од вашите постови.  Ќе го задржете нивното внимание и ќе ги охрабрите да читаат понатаму.

6. Бидете лесни за пронаоѓање

Направете вашиот сајт да биде едноставен за користење.  Користете јасни јазичиња и знаци, како и направете организација на материјалите со линкови така што посетителите можат да го најдат патот до она што сакаат да го читаат. На тој начин, посетителите кои доаѓаат  на една страница ќе бидат во искушение да прочитаат повеќе.

7. Не ги разочарувајте корисниците

Читателите се разочаруваат кога ќе налетаат на веб-сајт кој има малку или е без содржина, или на најави "во изградба". Истото важи и за линкови кои не водат никаде. Неколку кликнувања и посетителите наскоро ќе заклучат дека сите ваши страници може да бидат слично празни. Резултат - ќе престанат да кликнуваат. Затоа направете секоја ваша страница да вреди да се посети, или отстранете ја доколку не е во функција.

8. Бидете актуелни

Застарените материјали не се привлечни за корисниците, па затоа потрудете се да објавувате вести или информации, кои се актуелни и ажурирани. Објавете и линк кон другите извори доколку сакате вашите статии да останат релевантни.

9. Бидете оригинални

Интернет пребарувачите лесно можат да откријат доколку некоја статија е плагијат. Значи потребно е веста да биде оригинално напишана или да додадете свој коментар на настаните и темите кои се предмет на дискусија. Добар преглед со неколку извори на вести може да биде корисен, вклучувајќи ги и вашите лични искуства или ваши оригинални фотографии, препораки кон читателите.

10. Користете илустрации

Фотографиите и креативните илустрации може да го направат вашиот сајт атрактивен, да додадат кредибилитет на статиите и да го задржат интересот на посетителите. Доколку имате сопствени слики одлично, меѓутоа доколку немате проверете на интернет пребарувачите и ќе најдете речиси неограничен број на слики и илустрации за секоја тема. Проверете ги и авторските права, бидејќи некои слики не е легално да ги користете.


Наш избор на сајтови
© 2014 Веб Адресар